Fossavatnsgangan er elsta skíðamót sem enn er við lýði á Íslandi og hefur jafnframt verið fjölmennasta skíðagöngumót landsins undanfarin ár, með 100-150 þátttakendur. Komin er hefð á að gangan fari fram fyrsta laugardag í maí og markar hún jafnan lok skíðavertíðarinnar hér á landi. Fossavatnsgöngunni er ætlað að vera vettvangur fyrir alla unnendur skíðaíþróttarinnar og hollrar útiveru, hvort sem það eru þrautþjálfaðir keppnismenn, útivistarfólk, trimmarar, byrjendur eða börn. Allir geta valið sér vegalengd við hæfi, og hversu breitt sem bilið verður á milli manna í brautinni, þá sameinast allir að göngu lokinni í hinu víðfræga Fossavatnskaffi, þar sem viðurkenningar eru veittar og borðin svigna undan kaffikrásunum.

Lengst af var aðeins ein vegalengd á dagskrá Fossavatnsgöngunnar, u.þ.b. 20 km leið frá Vatnahnjúk í nágrenni Fossavatns yfir á Seljalandsdal. Árið 1987 bættist 10 km vegalengdin við og tveimur árum síðar var einnig farið að bjóða upp á 7 km leið sem er mjög létt og hentar vel allri fjölskyldunni. Nú í vor verður svo enn bætt við vegalengdirnar þegar tekin verður upp keppi í 50 km göngu.

Fyrsta Fossavatnsgangan fór fram á annan Páskadag árið 1935. Keppendur voru 7 talsins og var brautin mæld 18 km. Sigurvegari varð Magnús Kristjánsson úr Skátafélaginu Einherjum á tímanum 1 klst. og 50 mínútum, annar varð Sigurjón Halldórsson úr Herði á 1:53 klst. og þriðji Sig.Baldvinsson úr Einherjum á 1:54 klst.

Á fimmta og sjötta áratugnum féll Fossavatnsgangan 14 sinnum niður frá árinu 1955 hefur hún farið fram á hverju ári. Þátttakendur í lengstu vegalengd göngunnar, 20 km, eru orðnir um 1.300 frá upphafi, þar af hafa 15 manns náð að verða sigurvegarar. Enginn hefur verið sigursælli Kristján Rafn Guðmundsson sem 12 sinnum kom fyrstur í mark á sjöunda og áttunda áratugnum. Besta brautartímann á hins vegar Norðmaðurinn Eileif Mikkelsplass, en hann keppti í göngunni árið 1985 og barðist um sigurinn við bróður sinn Pål Gunnar, sem er öllu frægari í skíðaheiminum. Eileif varð einni sekúndu á undan og tími hans, 53:31 mín. stendur enn sem brautarmet. Bestan tíma Íslendings á hins vegar Ísfirðingurinn Einar Ólafsson, en hann gekk á 55:25 mín. árið 1989.

Líklega hefur enginn tekið þátt í jafn mörgum Fossavatnsgöngum og Sigurður Jónsson (Búbbi prentari) en hann tók þátt í þriðju göngunni, árið 1938, og hefur verið með í flestum Fossavatnsgöngum síðan.